ياااااااخوي

عزالله اني يافتى الجود راجيك
راجيك رجوى المنسجن للفراجي
وعزالله اني بالموده مخاويك
خوة غلا ماهي بخوة هراجي
اسمع كلامي وانتبهله وانا اخيك
اترك طريق اللي مخاويك راجي
كم واحدٍ يضحك تحسبه يسليك
يضحك عليك وماوراه ابتهاجي
يمشي معك وان شان وقتك يخليك
ماينفعك لاجاك ظرفٍ مفاجي
مادام يلقى بك مصالح مصافيك
واذا انتهت باعك بسوق الحراجي
احرص علي شخص ٍ يعزك ويغليك
ياقف بصفك بالمطر والعجاجي
واترك حبيب ٍ في عذابه يبكيك
حبه وشوفه واتصاله مزاجي
ياخوي انا والله ماني بناسيك
انته علي راسي مخليك تاجي
واطلب عسى رب البشر يعتني فيك
ويحطلك دون المشاكل سياجي
واللي تبيها بالسعاده تهنيك
اللي على السنه تبيها زواجي
ابشر بها نبذل لك الجهد وتجيك
اللي نحرها مثل نور السراجي
واطلب عسى يحميني الله ويحميك
ربن عليم بكربتي وانفراجي